政壇：埋到泛民堆 「莫」做夾心人
泛民功能界別議員經常做夾心人，近排被「夾」得最犀利非資訊科技界議員莫乃光莫屬。早排喺議會審議創新科技局時，佢已經因為撐開局，同泛民中人唔對嘴，而搞得內外不是人，點知，今日立法會又要恢復二讀俗稱「網絡二十三條」嘅《二○一四年版權（修訂）條例草案》，佢再次中招。
早前審議創科局時，莫乃光因為撐開局已做夾心人。（資料圖片）
莫乃光本身係支持原草案嘅，但近日網民及激進勢力推波助瀾，壓力大增下，佢又疑似急急轉軚，聲言如果泛民對原草案提出嘅修訂被否決，佢就會反對原草案喎。
佢呢招置諸死地而後生，擺明係要挾政府，只不過，知識產權界唔少行業代表都支持立例，作為資訊科技界嘅代表，莫乃光呢個姿態雖埋到泛民堆，但分分鐘得失自己嘅業界，有乜後果，真係佢先知嘞。
