政壇：搞搞政：建仔遭惡搞 網上誓復仇
網絡嘅社交平台已成政界新戰場，區議會選舉投票率破紀錄，泛民主派就係利用社交網絡催票，幫咗唔少忙，建制派就一直棋差一着，聽聞民建聯痛定思痛，積極改革網上宣傳策略，更以民主黨（白鴿黨）年前成立的創意媒體部為藍本，誓要絕地反擊。該黨多名議員都係網民「寵兒」，好似蔣麗芸就被人惡搞得多，今次睇嚟要上演網絡復仇記。
耆英化fb冇人流
其實，建仔過去都討論過搞創意媒體，弊在該黨近年嚴重耆英化，老將嘅思想仍停留喺依賴地區動員助選，以為一味實幹就能夠「冧莊」，二來抽水、惡搞一向並非建制嘅優勢，甚至Facebook（fb）個人專頁都唔多人流，「收視率」太低，可以贏得網民「讚好」支持以至傳媒報道的，陳克勤算是做得比較成功嘅一個。經歷今次區選後，卒之有人狠下心，成立建仔版創意媒體部亦再次成為議題，成功與否除了要解決請人問題，更重要是黨內有否創意氣氛。
經常被惡搞嘅建仔中人話，建仔作為「正經大黨」，一直唔做挖苦、抽人水的事，但年輕人鍾意，惟有改革。不過，佢哋搞創意能否成功，都要睇該黨係咪「潮」得起，如果搞得老老土土，恐怕反擊不成，反被恥笑及再惡搞都似！
