近排天口凍，又係時候約埋三五知己打番個靚邊爐。之不過打還打，健康始終最緊要，否則隨時病從口入，咁就大件事嘞。

唔係靠嚇㗎。本報記者抽驗市面上多款內地及本港品牌嘅現成火鍋湯包樣本，發現大部分鈉含量超標，最誇張嘅其中一款麻辣湯底，每一百克湯料含超過一萬毫克鈉，只要飲用四茶匙就超出世衞每日攝取上限；即使標榜鮮甜嘅清湯湯底，亦超出英國食物標準局建議嘅高鈉標準，問你點頂！

千祈咪以為小事吖，人體攝取過量鈉，後果可大可小。有註冊營養師表示，因血壓高、心臟病求診嘅病人當中，部分就係因為攝取太多鈉而致病；亦有腎科醫生提醒，攝取過多鈉含量會導致高血壓、腎病。你知喇，香港人食嘢不嬲重口味，食安中心數字顯示，超過六成成年人每日吸收鈉含量超出世衞上限，再食埋咁多超鹹火鍋，容乜易烚吓烚吓烚出病㗎！

好嘞，邊爐湯包鹹到爆錶，唔通當局冇監管嘅咩？唔講唔知，真係無王管㗎。現行法例對於鈉含量只係分為「低」、「很低」以及「不含」三種營養聲稱，但就冇為中、高級別制訂標準，亦冇硬性要求廠商喺包裝上標示詳細營養標籤，消費者無從選擇，唯一可以做嘅，可能就係學似專家話齋，打邊爐時盡量避免點醬汁，同埋唔好連湯料都飲埋。

所以話，官僚靠得住，豬乸會上樹，特別係懶到出汁嘅食安官僚，旨意佢哋把關，慳番啖氣好過。除咗鈉含量無王管，本港食物重金屬含量嘅法例亦遠遠落後於先進地區，部分食物含鉛標準甚至比國際水平寬鬆六十倍，簡直靠害。

講開又講，本港食安問題多多，危機處處，火鍋湯料鈉超標只係碎料咋！近年兩岸三地黑心食品層出不窮，直頭好似病毒交叉感染咁款，淨係講火鍋，內地有用致癌物甚至罌粟殼製成嘅「上湯火鍋」；台灣亦有火鍋店提供含禽鳥糞便嘅「加料豬紅」，以香港食安官僚後知後覺嘅往績，呢啲「極品」有冇流入本港，真係冇人話得埋。

諗諗吓做香港人都幾悲哀，吸嘅空氣混濁，飲嘅食水含鉛，估唔到連打邊爐都要提心吊膽。有人建議以自家清湯取代現成火鍋湯包，計太一叮話齋，黑心食品防不勝防，再咁落去，市民遲早要自己種菜養雞都似，叮！