「宇宙最強」甄子丹嘅太太汪詩詩帶同一對子女出席芭蕾舞聖誕聚餐，佢話：「仔女無上台表演，嚟支持啲朋友嘅仔女。囡囡Jasmine好細個嘅時有學過芭蕾舞，佢好知自己鍾意乜嘢，佢話想轉唔同嘅跳舞style，依家學緊拉丁舞同Hip Hop。」問到佢妹妹汪圓圓最近佗孖B嘅情況，佢話：「佢個肚開始好重，依家要休息多啲，我見佢今次佗孖B覺得佢係辛苦過佗第一胎，動作慢咗好多，已經唔可以烏低身拎嘢，囡囡Celine都少抱咗，個肚入面都兩個，仲抱多一個就三個。」有無諗定BB嘅名？佢話：「我哋大家都有意見，一講就會有拗撬，所以唔講，聖誕節要開開心心。今年聖誕老公（甄子丹）要宣傳《葉問3》，無得出埠玩。」

汪詩詩話囡囡好細個就學過芭蕾舞。

何志恩話兩個女都好鍾意睇Eason。

何志恩聽Eason當胎教

同場見到時裝設計師何志恩，佢被問及囡囡有冇要求睇偶像嘅演唱會？佢就話：「囡囡契爺Eason（陳奕迅）囉，嚟緊我哋會去澳門睇，睇倒數嗰場。兩個女都好鍾意睇Eason，由細睇到大，我佗住個大女時已經睇，胎教。」再追問囡囡有冇話想入娛樂圈？佢話：「嘩，唔好喇，大嗰個好鍾意演戲同唱歌，有做drama，好鍾意上台。」

第一手消息請下載on.cc東網iPhone/iPad/Android/Windows Phone Apps