城中鏡：黃楚恒 六年抱五
話說浙江省同鄉會聯合會（浙聯會）青委早前喺會所浙江軒舉行紹興酒講座暨大閘蟹宴，吸引唔少愛蟹一族去擦餐飽。中華總商會青委主席Stanley黃楚恒同太太Kelly陳嘉妮都有到場。見Kelly腹大便便，真係畀佢嚇咗一跳，事關年幾前佢先至生咗一對孖仔，加埋已有一女三仔，唔通咁快又有喜？
黃楚恒（中）同太太Kelly（左二）又再添丁，中總青委手足王淑慈（左一）、陳建年（右二）同陳惠儀都戥佢哋開心。
項明生亦有出席蟹宴。
車弘健（右）同顧偉誠聯手推廣酒文化。
車弘健分享珍藏黃酒
Stanley笑笑口話今次生完真係要收工，事關計埋肚中BB仔，共有五名子女，六年抱五，認真超晒標。福建人鍾意多子多孫，Stanley媽媽、中總婦女委員會副主席黃周娟娟一定好開心喇，點知Stanley笑稱：「媽咪抱孫抱到麻木晒！」有添丁之喜嘅仲有浙聯會青委主席David顧偉誠，幾個月前佢升呢做爸爸，見佢講起個仔就笑不停，旁人都感受到佢嘅喜悅。
當晚浙聯會青委前主席兼紹興旅港同鄉會會長Anthony車弘健一早到場打點，仲帶埋多款珍藏紹興酒分甘同味。紹興酒即係黃酒，同啤酒、葡萄酒並列世界三大古酒，Anthony話雖然台灣同日本都有紹興酒，但係浙江紹興因氣候同水源唔同，所以特別香醇好味，同大閘蟹更加係絕配。
Anthony仲請埋一班識飲識食名家嚟品嘗，包括旅遊作家James項明生，James自爆亦係浙江人，但今次係首次到浙江軒食嘢，唔知Anthony會唔會游說佢加入浙聯大家庭呢？
