各政黨正就明年九月立法會選舉部署，白鴿黨周年會員大會尋日討論五區直選布陣，點知愈搞愈亂喎。據悉，白鴿黨選舉委員會主席「單雞」單仲偕建議每區只派一隊出選，白鴿黨前主席「高達」李永達仲不惜自揭瘡疤，話當年新界西派兩隊參選，最後兩邊都唔夠票一齊落選，話與其分散資源，不如審慎啲集中撐一隊。

元朗區議員黃偉賢喺會上仲提臨時動議，獲早前喺區選落敗嘅陳樹英和議，最終以六十二票支持對六十一票反對，一票之差通過新西派出最多兩隊；而新東只派一隊嘅動議，則遭與會者大比數否決，換言之，白鴿黨明年喺新東同新西都可派最多兩隊出戰。仲記得一二年新西全軍覆沒一席都冇，加上陳樹英、黨副主席尹兆堅、元朗區議員鄺俊宇等人均有意願喺新西爭出線，唔知今次會唔會重蹈覆轍，議席數目再次「貪字得個貧」呢？新東方面，有分析指選戰布陣關鍵係黨主席劉慧卿嘅去留，呢個亦會影響黨總幹事、候任北區區議員林卓廷進身立會嘅機會。

港島、九龍東同九龍西三區方面，會員大會決定維持派出一隊參選，其中後兩者無甚爭議，很大機會由胡志偉同黃碧雲冧莊爭取連任，相反港島方面仍係一場亂局，幾隻爭出選嘅「乳鴿」唔知點搞？

南區區議員柴文瀚同中西區區議員「峯鴿」許智峯陣營仍在明爭暗鬥，事有湊巧，會上通過挺柴嘅黨副主席羅健熙所提動議，將現時甄選候選人比重，由八成民調、一成支部區議員同一成支部黨團，調整至六成民調、兩成支部區議員同兩成支部黨團，加上中委補選「四揀三」，唯一落選者係過去同峯鴿「拍住上」嘅候任中西區區議員吳兆康，凡此種種似乎並非偶然，一日未正式拍板，雙方嘅惡鬥只會愈演愈烈！

第一手消息請下載on.cc東網iPhone/iPad/Android/Windows Phone Apps