泛民主派喺今屆區議會選舉沙田區攞到好成績,民選議席數目同建制派打平手,除咗白鴿黨同新民主同盟有議席進帳,幾名現任獨立泛民區議員麥潤培、衛慶祥同容溟舟,以及兩名「傘兵」黃學禮同黎梓恩都順利連任或當選,以上五人都有一個共同特色,就係全部都先後退過黨,其中麥同衛退出過白鴿黨;容溟舟先退白鴿黨、後退新民主同盟;黃同黎就分別退出「傘兵組織」青年新政同沙田新幹線。麥潤培尋日仲喺社交網站宣布,五人將合組「新退黨同盟」,並聲言要正式註冊同公開招收黨員添!

「新退黨同盟」黨徽係一個人形公仔跑緊出一道門,猶如緊急出口標誌,而口號則為「退一步,康莊大道」,同某團體嘅「退黨保平安」有異曲同工之妙;英文名就叫Neo Exit Party Alliance Line,簡稱Nepal,同亞洲國家尼泊爾同名。

自稱為「新退黨同盟」關公部(關係公共部)部長嘅麥潤培接受查詢時澄清,註冊組黨只係「搞噱頭」,希望吸引年輕人注意,成為佢哋嘅地區義工。佢又話歡迎任何退黨人士加盟,包括前建制派成員。

「唔亂踢人走」寸白鴿黨

當問及若加入咗「新退黨同盟」,之後再退黨又點算?麥潤培笑言會將退黨者榮升做永久榮譽會員,地位德高望重。

麥潤培又強調一定唔會好似白鴿黨新界東支部咁,搞小圈子投票亂踢人出黨,明寸白鴿黨之前將佢踢出黨。

無論係咪真係叫做「新退黨同盟」,麥潤培等五名獨立泛民都已形成沙田區議會一股新勢力,喺該區同白鴿黨、新民主同盟鼎足而立。

第一手消息請下載on.cc東網iPhone/iPad/Android/Windows Phone Apps