「又到聖誕，又到聖誕，下個聖誕，有無今年咁歎？」呢首歌一響起，大家就知道普天同慶嘅節日就快到喇。可惜吖，今時唔同往日，家陣香港經濟慘淡，百業凋敝，睇怕要改唱「今個聖誕，唔使旨意有舊年咁歎」咯。

係人都知，零售等服務業主要靠節日食胡，隨住旅客人數減少，加上消費模式轉變，旅遊業不景，淡風橫掃各行各業，搞到零售銷情持續低迷，唔少旺區商場十室九空，人流疏落，商戶終日拍烏蠅，都咪話唔閉翳。

餐飲業界亦唔係好得幾多，旅客唔上門，加上市民消費意欲低迷，行內人士早已打定輸數，估計今年聖誕生意額較往年下跌三成，即使成本大增亦唔敢加價，反而要推出平價聖誕套餐吸客，可謂賤物鬥窮人，分分鐘賺埋都唔夠交租。

冇辦法啦，隨着內地愈來愈開放，旅客大把地方去，香港嘅優勢已所餘無幾，加上激進組織不斷搞搞震，唔係「驅蝗」就係「鳩嗚」，內地旅客避之則吉，當然唔會來港貼錢買難受啦。

嗱，旅發局最新數字顯示，十月訪港旅客只有約五百零七萬人次，按年下跌百分之二點七，當中內地旅客更跌逾百分之四。酒店及賓館業首當其衝，平均入住率比去年下跌約一成，業界擔心聖誕節嘅黃金檔期仍然難有起色，隨時要變招割價搶客。

唔怕唔識貨，最怕貨比貨，本港旅遊及零售業步入寒冬之際，鄰近地區不知幾好景。好似日本咁吖，計劃將原本買滿一萬日圓以上至能退稅嘅限制，放寬為買滿五千日圓即可，希望通過放寬退稅限制，進一步刺激旅遊業。南韓亦唔執輸，宣布明年起將免稅範圍擴展到市內小店，旅客唔使喺機場排隊退稅，自然血拼得更疏爽更開心喇！

話時話，面對周邊地區紛紛出招搶旅客，港府又有乜招數迎戰呢？港產官僚無嘢叻，最叻就係等運到，旅遊事務專員仲死撐香港係美食天堂，話可以發揮本身優勢吸引客源喎，問你服未。

雖然話聖誕難過年年過，不過今年寒氣刺骨，實在特別難過。正所謂一榮俱榮，一損俱損，零售及旅遊業係基層勞工密集嘅行業，當局繼續闊佬懶理，任由業界自生自滅，過年後分分鐘出現倒閉及裁員潮，到時睇吓港產官僚仲有冇咁滋油淡定，叮！