政壇：金融監管太嚴礙發展
政府經常話鼓勵人創業，尋日有個互聯網金融論壇，唔少與會人士話喺香港搞創新事業唔容易，唔單止發展空間、配套唔夠，政府部門嘅規管都比較多，所以佢哋寧願北上創業。
洪為民話，香港對金融監管嘅限制，阻礙咗互聯網金融發展。
前海管理局香港事務首席聯絡官洪為民都有出席個論壇，佢話香港過去引以為傲嘅係超穩定金融體系，但呢個亦阻礙咗互聯網金融發展，希望政府要思考吓監管去向。
喺內地搞交通卡（類似香港八達通）嘅「都都寶」行政總裁何宗盛本身係港人，但佢話喺香港做互聯網金融好難，佢仲話希望有日監管機構可以隻眼開、隻眼閉咁，等佢哋做咗先管：「怕畀警察拉，乜嘢都講Compliance（合規）！」
雖然佢哋有唔少怨言，但遇上金融安全嘅問題時，香港嘅優點正係監管相對嚴、金融體系夠穩定，先吸引到咁多大公司嚟，並且做到國際金融中心喎。
