政壇：搞搞政：工商界反擊 「沖」走張建宗
勞資雙方近期熱議取消強積金對沖機制，工商界更就此密謀大反擊，反對將取消強積金對沖機制包括在退休保障計劃諮詢範圍內。這場反擊戰率先由工業總會及總商會揭開，將會在下周四聯同中華廠商聯合會、中華總商會及地產建設商會一齊出手，再加上香港中小企聯合會及香港僱主聯合會等商界組織。睇嚟，商界已經擺定陣勢，佢哋嘅立法會代表林健鋒、梁君彥等更準備反擊，呢次真係唔知勞福局嘅張建宗搞得掂對沖機制，定係佢自己被商界嘅大水盆沖走嘞。
撤積金對沖 應再研究
由商界聯合舉辦強積金對沖機制論壇，已經請到中大前校長劉遵義、總商會常務副主席吳天海及強積金計劃管理局主席黃友嘉主講。工商界認為，將取消強積金對沖機制包括退休保障計劃諮詢一事，政府應該先做研究再作決定，而非經過六個月諮詢後就將強積金對沖機制取消。雖然話呢個係特首梁振英（CY）競選政綱之一，但CY政綱都寫明「在訂立新法規時，要評估對中小企及小商販的經營環境帶來的影響」，所以工商界執住呢一點，大家都有排拗。
工商界已出言「恐嚇」，指現時經濟環境差，取消強積金對沖機制就要將負擔轉嫁到消費者身上，還表明今次論壇只是頭炮，唔排除再會有激烈行動！反觀勞工界方面，未來繼續爭取標準工時立法、劃一勞工假與公眾假期，相信勞資雙方交鋒及惡鬥將會持續，小肥張夾喺中間，真係有排受。
