政壇：新東初選 泛民撳傘兵
立法會新界東補選二月底舉行，提名期下月就開始，啱啱喺區議會選舉嶄露頭角嘅「傘兵」組織青年新政有意參加補選，仲去信要求同公民黨（公文袋）商討，又提出以初選形式協調派人出選。不過，公文袋至今歎慢板，黨魁袋巾傑梁家傑更懶懶閒、閂定半道門咁。
賴時間人手唔夠
其實傳統泛民唔多想睬新勢力，都係因為補選事小，明年立法會選舉才事大，泛民主派唔想助長「傘兵」聲勢，只係呢種大佬文化似乎不合民主真諦囉！
青年新政早前明言有意參加新界東補選，而終極目標更是明年立法會選舉。他們建議泛民舉行初選，但下月就是提名期，尋晚雙方會面後，據悉公文袋又話時間緊迫，又賴人力不足拖住先。而人民力量立法會議員陳偉業擺明唔會支持「傘兵」，仲嫌「傘兵」連支持雙普選都不敢寫落政綱，與泛民唔係同路人。
泛民中人認為，只要不是撞選區，在區選支持「傘兵」都無所謂，但立法會選舉實行比例代表制，勢不相讓好難避免，特別係走激進路線、票源可能會重疊嘅社民連、人民力量、熱血公民，甚至公文袋。而今次補選，即使「傘兵」未能跑出當選，但亦可作為明年立法會選舉宣傳、試水溫嘅大好機會。為免助長他人聲勢，滅自己威風，泛民梗係懶理初選建議，將「傘兵」撳得就撳。
不過，相對激進派，行溫和路線的民主黨（白鴿黨），以及聲稱行「第三條路」的新思維就表現得無所謂，皆因新思維都有意參加新界東補選，如果真是搞初選，說不定他們都會參與。而白鴿黨早已表明唔會派人參加補選，據指明年真正受「傘兵」威脅的反而是白鴿黨面對的泛民對手，話唔定，「傘兵」冒起，白鴿黨樂見其成。
