港珠澳大橋同高鐵有乜共通點？答案大家都知道，同樣係造價不菲嘅超級工程，同樣出現嚴重延誤及超支，而且同樣可能遇到立法會拉布狙擊，追加撥款究竟可唔可以順利過關，只能等運到嘅咋。

即係咁，由於港珠澳大橋同高鐵工程都出現嚴重超支，港府急需向立法會財委會分別申請追加五十四億元及一百九十四億元撥款，否則可能要被迫停工，隨時爛尾收場。而財委會亦計劃加會審議，希望可以喺一月及三月死線前通過喎。問題係，喺泛政治化嘅今日，立法會拉布成為常態，連惠民措施亦經常受到阻撓，何況追加咁大筆嘅撥款，點可能順利過關吖。

嗱，部分激進議員已經講到明，財委會加會不符正常程序，必定會拉布阻止，包括提出各項動議及休會議案。大家應該仲記得，當年立法會審議高鐵工程撥款時，搞到滿城風雨，甚至出現包圍立法會嘅火爆場面，財委會連開幾日會至勉強通過，家陣政治環境更加惡劣，追加撥款更加惹火，想平平安安都幾難。

所以話，近年嘅基建工程真係多災多難。好似高鐵咁吖，當局話就話為超支「封頂」，為財政黑洞斬纜，諗住畀建制派議員一個落台階，方便財委會闖關，可惜反對派根本唔賣帳。港鐵大玩財技，打算用派息氹小股東通過方案，但有乜板斧令激進議員收手呢？如果高鐵追加撥款無法通過財委會一關，就算點樣封頂，點樣斬纜，都係嘥氣喇。

講開又講，高鐵已經完成大部分工程，投入數百億元公帑，萬一真係爛尾，等於倒錢落鹹水海，最終損失嘅咪又係納稅人。仲有吖，高鐵內地段早已完工通車，香港段拖拖拉拉本來已經夠丟架，如果因為追加撥款受阻而一延再延，想唔變「港恥」都唔得咯。

講到港恥，港珠澳大橋亦唔好得幾多。呢項所謂國家級工程，當初受阻於司法覆核，搞到又延誤又超支，當局警告如果財委會唔通過追加撥款，就要被迫縮減部分工程，包括減少檢查亭同停車場設施等，即係話就算大橋最終能夠通車，設施亦可能天殘地缺，國家級工程變成國家級笑話都似。

唔怪得終審法院前常任法官列顯倫忍唔住，罕有咁炮轟有人濫用司法覆核。其實計太一叮話齋，今日香港烏煙瘴氣，唔止有人濫用司法覆核，有人更濫用拉布添吖，叮！