城中鏡：高科廠新天
早前香港青年工業家協會暨基金會舉行就職禮，成謙實業主席Jacky張華強接替嚴志明成為新一任會長，講起過往協會於唔同學校舉辦演講嘅經歷，Jacky就話好驚訝好多同學及老師一講起工廠都淨係諗起穿膠花，對工業印象仲停留喺以前電視劇嘅畫面，其實依家啲廠房好先進，有啲仲有落地玻璃，環境好靚，同以前已經唔同晒。
張華強（左）接替嚴志明成為新一任香港青年工業家協會會長。
顏吳餘英（左）卸任協會基金會會長一職，由史立德接棒。
陳家偉（左）話有十五年冇離港過聖誕，旁為「九巴金公主」伍穎梅。
本身做代工生產喇叭同耳機等音響產品嘅Jacky，當年畢業投身公務員行列，後來儲夠錢供完樓就離開政府闖天下，由開始經營貿易生意，及後同兩岸廠家合作，成為工業界一分子。佢話現時香港主力做高增值工業，唔單止廠房環境先進，產品亦愈來愈高科技，好似耳機過往只係單向播放音樂，現時最新款耳機可感應同測量用家心跳，方便喜愛跑步或做運動嘅人士。
一條龍配套降流失率
提到廠房環境改變，執行委員張綺媚就話佢哋喺江西廠房附近有一間員工家屬專屬幼稚園，等員工唔使為子女撲學校，而深圳同江西廠附近均有旗下住宅物業畀員工以八折價錢購置物業，一條龍配套可以令員工流失率降低，唔使擔心請唔到人之餘，有啲員工更加係三代人都喺佢哋公司工作添！
同場仲有接棒成為基金會會長嘅史立德、基金會前會長顏吳餘英、秘書長戴麟、執行委員陳家偉同楊少聰等。陳家偉話每逢臨近年尾都比較忙，仲透露已經有十五年冇試過喺聖誕期間外遊，因為要籌備工展會工作，順便留港消費，起碼要到農曆新年先可以同家人旅行滑雪嘞！
