早前政府同港鐵合演「財金大龍鳳」，為高鐵超支一百九十四億元遮醜；繼有港珠澳大橋香港段延至一七年底先完工，須申請五十四億元追加撥款；最新到港鐵沙中線出事，要延至二○二一年通車兼超支四十一億元。多項大型鐵路、大橋基建項目嚴重延誤同超支，運輸及房屋局局長張炳良明顯監管塞責，但佢淨係識用納稅人血汗錢「埋單」填呢啲無底深潭，分分鐘搞到庫房乾塘，聽畀人兜走啦！
