港人去泰國玩，必買手信實有「小老板」（Tao Kae Noi）紫菜，尋日剛喺曼谷上市，係佢哋生產商Taokaenoi Food ＆ Marketing PCL隻股票真係掛牌嗰隻上市，佢哋老闆名副其實係小老闆，事關佢係80後，今年先得三十一歲！呢位80後小老闆Itthipat Peeradechapan，以前係打機男一名，佢點由打機男煉成今日嘅泰國零食大王？

話說Itthipat係泰國出世嘅華僑第二代，屋企本來係生意世家，喺佢十幾歲時，九八年亞洲金融風暴殺到，家道中落兼負債纍纍。佢急急想賺錢，高中就開始幫軟件開發商打機試Game嚟賺錢。

二十歲都未到嘅佢第一桶金係靠賣糖炒栗子，仲用呢一桶金搞起佢嘅紫菜事業。喺○四年起，全泰國約三千間七仔（7-11）都賣緊「小老板」紫菜；又兼且喺○七年幫屋企還清晒啲債。佢嘅經歷仲喺一一年被改編過拍戲《海苔億萬富翁》（The Billionaire）添！

第一手消息請下載on.cc東網iPhone/iPad/Android/Windows Phone Apps