政壇：搞搞政：建制派爭位 觀塘爆內訌
尋日講過鄉事派有意連同泛民主派對抗建仔，搶番幾個新界區議會嘅正副主席位，最新消息話觀塘區亦盛傳會爆發大混戰及建制派內訌，秀茂坪北區議員黃春平將單挑由○四年至今擔任咗三屆主席嘅陳振彬。
黃春平擬挑戰陳振彬
黃春平自一一年當選觀塘區議員後，隨即被爆出做過西環高層，其後一直刻意保持低調。直至前年佢出任由陳振彬牽頭成立嘅創建力量，並擔任秘書長一職。不過，黃最近似乎有意更進一步，向穩坐多年區議會主席嘅陳振彬落手，趁區議會換屆四出拉票，希望爭取支持佢擔任主席，有關消息已傳至新界區。如果情況屬實，意味建制派內訌，創建力量自己人打自己人。
綜合各方消息，恐怕黃春平未能如願。有地區人士分析，雖然陳振彬早前喺一億元地區重點項目中，疑似篩走其他議員提出的方案，僅保留對其選區有利嘅升降機塔工程，更因此被質疑難以服眾。不過，衡量各方利弊後，該區仍屬意由陳振彬繼續做主席，原因係擔心黃春平做主席會予人「染紅」觀塘嘅印象，加上陳振彬無論在財力、人脈同統領能力方面都相當出眾，確係擔任主席不二之選。
陳振彬接受查詢時坦言，的確有唔少人覬覦正、副主席之位，但認為屬正常現象，佢又話每個人都有長處，係咪「冧莊」做主席要視乎支持度，有需要佢樂意繼續做下去。最終結果係點？下月初就會揭盅嘞！
