政壇：Greg蘇戴定頭盔 防甩轆

耍冧讚年輕人有創意

喺面對網民同立會議員嘅夾攻下，潛水多日嘅商務及經濟發展局局長Greg蘇錦樑，尋日先至急忙為草案解畫，似乎係想戴定頭盔以防再次甩轆。

《版權修訂》條例三年前因為部分泛民議員拉布胎死腹中，政府其後就草案重新諮詢公眾，並鐵定下周三再提交立法會二讀，但網上反對浪潮依然洶湧。

阿Greg尋日出席亞洲知識產權營商論壇專題午宴演講之後，終於識得派定心丸，強調當局一直有同各位立法會議員就相關議題充分合作，指《版權修訂》條例跟足國際標準推行，冇收窄任何言論自由，反而為業界製造好多高增值、有創意嘅經濟機會，仲耍冧讚年輕人喺呢方面嘅創作能力高，希望大家從唔同角度去看待條例喎。

不過，泛民主派似乎唔肯領情，繼人民力量、新民主同盟同個別公文袋議員堅決投反對票之後，白鴿黨尋日召開黨團會議後亦決定，由於政府唔支持泛民就草案提出嘅修正案，決定跟隨反對法案，意味支持法案嘅黨友「單雞」單仲偕游說失敗，據知係由於黨內「乳鴿」都傾向反對所致。

其實阿Greg又使乜驚喎，條例喺建制派護航下幾乎肯定通過，大家都係擺吓姿態，但點樣擺平網上反對草案嘅輿論，睇怕阿Greg要多啲「打卡」聽吓網民意見嘞，咪淨係掛住同明星影相「集郵」至得o架！