內地電視台曾搞咗個「你幸福嗎？」嘅調查，結果答案五花八門，笑話百出。如果以同樣嘅問題問香港人，又會得到乜嘢答案呢？

呢，有大學調查顯示，以零至一百分計算，今年港人快樂指數只有七十分，比去年低零點五分，創七年來新低。具體指標方面，市民對生活環境同公共醫療嘅滿意度都出現顯著下跌；年齡組別方面，除咗三十歲以下年輕人之外，其他所有組別嘅快樂指數都不升反跌。你話嘞，喺咁嘅情況下，港人又點可能幸福吖？

其實，香港人唔快樂，早就唔係乜嘢新聞。隨着香港不斷沉淪，快樂就好似稀有嘅古董，離港人愈來愈遙遠。冇計喇，以前香港繁榮穩定，安居樂業，家陣動盪不安，家無寧日，市民唔愁就假。難怪有人話，香港只有兩類人仍然快樂無憂，一類係尸位素餐嘅庸官劣吏，無論點樣施政甩漏，點樣醜聞百出，依然好官我自為之；另一類就係唯恐天下不亂嘅政客，香港愈烏煙瘴氣，佢哋愈可以渾水摸魚。

歸根究柢，市民愈來愈唔快樂，主要原因係香港愈來愈政治化，既見唔到前景，亦搵唔到出路。日前一份關於香港、台灣、新加坡同內地嘅「四地華人社會進步指標調查」顯示，四個地區不約而同有最多人認同新加坡社會最進步，其次係內地，而香港同台灣就分別排第三及第四位。唔怕唔識貨，最怕貨比貨。新加坡集中精力發展經濟，改善民生，成就有目共睹，成為四地華人社會嘅楷模；反觀香港同台灣一樣，陷於政治泥沼不能自拔，搞到競爭力每況愈下，經濟低迷，民生凋敝，簡直不可相提並論。

所以話，唔理黑貓定白貓，捉到老鼠就係好貓。香港有人嘲笑新加坡實行威權統治，欠缺民主自由，其實，新加坡嘅成功，已足以證明香港人夜郎自大。唔使講咁多，以前星港經濟情況不相伯仲，家陣新加坡人均GDP足足比香港高三分一，問你服未。喺亞洲四小龍中，香港同台灣本來排名最前，今日之所以搞到雙雙落後於人，同病相憐，咪就係被政治化所累囉。

事實證明，一個城市政治掛帥，經濟同民生就冇運行，幸福自然無從談起。有啲政客開口埋口為民請命，其實計太一叮話齋，如果佢哋真係為市民利益着想，最有效嘅方法就係自動消失吖，叮！