城中鏡：霍啟剛 支持南沙搞體育
香港青年聯會首席參事霍啟剛尋日出席香港貿易發展局同環球香港商業協會聯盟主辦嘅「香港論壇」，講起其家族喺南沙嘅發展，佢話家族已喺當地投資咗十幾年，近期快速發展，唔多唔少係因為廣東自貿區嘅帶動。啟剛話南沙位處於香港、澳門同廣州之間，故可作為一個搖籃角色，聚集幾個地方嘅年輕人。
霍啟剛指南沙有潛力發展文化同體育。
啟剛認為南沙目前交通愈見方便，配合城市發展規劃，有更大地方容納文化同體育界嘅發展機會，舉辦類似國際單車賽等大型體育活動。南沙未來亦有潛力發展跨境電商、國際教育等，但發展一個城市唔應自設框框，局限喺發展某一些行業，佢以硅谷為例，稱只要教育同金融等環境配套做得好，就可吸引更多人前往發展同居住。
早前港中足球大戰一事，啟剛話希望大家唔好將比賽運動太政治化，認為應尊重規則同任何國家。
