城中鏡：「唔係菲律賓嗰啲」
喺國力書院博士學位風波爆出後，發現唔少政商界人士都有有關菲律賓大學嘅博士學位，部分更急急澄清自己係真材實學。日前喺一個教育活動上見到廣東社團總會前主席KK王國強，記得佢舊年重返校園修讀香港理工大學商業管理博士，唔知讀成點呢？KK一輪嘴細數讀書有幾認真、辛苦，仲抽水講笑話：「唔係菲律賓四個月（就攞到學位）嗰啲！」認真搞笑。
王國強話讀博士係「嚟真嘅」，唔係菲律賓四個月嗰啲。
李君豪（左起）、姚祖輝、華東師範大學前校長俞立中同蔡雋思交流教育心得。
鄧楊詠曼（右）同蔡黃玲玲感情要好，對教育一樣好上心。
KK啱啱同十個同學去咗瑞士玩五日，呢趟係學校規定要去嘅，上堂五日等於喺香港返學四個月。吓？咁濃縮速成，不免令人同最近「博士工廠」事件產生聯想喎。KK都覺得有啲唔對路，即笑笑口劃清界線，仲話已經返學返足四十五個星期六，即將近一年，所以佢係「嚟真嘅」。
蔡雋思一帶一路推廣華文
仁愛堂前主席Sophia鄧楊詠曼同蔡黃玲玲早前分別捐助五百萬元人民幣畀上海華東師範大學（華師大），校方特登來港舉行捐贈儀式，唔少城中名人去捧場，除咗KK之外，仲有連續多年帶港生返內地交流嘅全國青聯常委姚祖輝、香港加拿大國際學校創辦人李君豪，仲有現身同校方簽署戰略合作協議嘅新華集團董事蔡雋思，佢話將在「一帶一路」沿線國家推廣華文同儒家思想。
Sophia已喺內地捐助七間大學，佢話華師大係培養優質老師嘅學府，又位於佢家鄉，梗要支持啦！蔡黃玲玲就話教育好重要，所以多年前已捐助仁愛堂成立教育基金，帶學生到極地探險。今次佢同Sophia一齊做善事，冀為培育下一代盡一分力。
