政壇：公司申上市 怪名一籮籮

「扯旗山」其實係喺上海搞港式茶餐廳，仲搵埋周中師傅做非執行董事嗰間；「避風塘」亦係喺內地搞食肆，主打港式點心同小菜。

「周黑鴨」一樣食得，估吓間公司做乜嘢生意？佢哋係做鴨鵝類熟滷製品加工，創辦人周富裕喺九七年湖北集貿市場開設「周記怪味鴨」專賣店，○四年改名做「周記黑鴨」，仲註冊埋個品牌名「周黑鴨」。話時話，隻鴨喺內地有成幾百間直營店o架！

至於另一間「我訂花」，個名就直接到你唔信，佢哋係內地大型網上鮮花銷售商，佢哋嘅自營網上平台除咗「我訂花」外，仲有一個叫「531314」。「531314」係乜？即係「我想一生一世」咁解。

公司名夠突出，係咪招股易啲突圍呢可？香港上市商會總幹事黃明偉話「避風塘」、「我訂花」呢啲用番內地營運緊嘅品牌名，可加深內地投資者印象，都合理。但佢唔建議公司個名「玩太大」，個名太抽象，有疏離感，會降低投資者興趣。

香港股票分析師協會主席鄧聲興就話有啲規模唔大嘅上市公司，就算行內人都未必記得個名，但若然個名夠突出，就可以吸引到投資者眼球，好似佢自己見「扯旗山」個名咁得意，雖然未必會推介，但係都會留意吓間公司做乜嘢業務先。