支聯會自舊年四月喺尖沙咀富好中心開設「六四紀念館」，但礙於地點「隔涉」，參觀人數一直較預期少。支聯會常委趙恩來尋日喺facebook上載一張圖片，顯示港鐵剛喺尖沙咀同尖東港鐵站內嘅指示地圖，增設「六四紀念館」嘅位置指示，英文為「June 4th Museum」，希望可方便及吸引更多中外旅客同本港市民前往參觀。

港鐵在尖沙咀同尖東港鐵站內嘅指示地圖，增設「六四紀念館」嘅位置指示。

支聯會開設嘅六四紀念館位置「隔涉」，參觀人數較預期少。（資料圖片）

支聯會副主席蔡耀昌話唔少外國旅遊書籍都介紹香港六四紀念館，但香港本身反而缺乏相關資訊，支聯會轄下嘅管理委員會因此喺今年初去信港鐵，要求喺尖沙咀同尖東站增設相關指示牌；港鐵喺今年初回信，答允喺站內嘅指示牌同地圖加標紀念館位置，但位於港鐵出口嘅指示牌，則因屬繁忙位置而無法添加。

蔡耀昌認為港鐵此舉係認同六四紀念館嘅性質等同一般歷史博物館，可為六四紀念館作免費宣傳。不過，港鐵將六四紀念館歸類為「文娛及購物」設施，與區內多個大型購物商場毗鄰，似乎有啲格格不入。此外，六四屬敏感政治議題，今次港鐵提供指示，會唔會又掀起政治風波呢？

第一手消息請下載on.cc東網iPhone/iPad/Android/Windows Phone Apps