港產官僚冇嘢叻,最叻就係無事生非,添煩添亂,好似全港性系統評估(TSA)咁吖,其實外國都有類似測試,但人哋就相安無事,香港就搞到滿城風雨,想唔認無能都唔得。

TSA風波愈鬧愈大,群情洶湧之下,教育局被迫讓步,話如果無辦法改善操練文化,局方願意作重大調整,包括考慮取消小三TSA,可惜部分家長並唔收貨,計劃喺大埔三間小學發動罷課,爭議沒完沒了。有立法會議員警告,當局處理不當,呢單嘢分分鐘變成國教翻版,真係一啲都冇誇張。

古人教落,智者察於未萌,愚者喑於成事。TSA執行過程荒腔走板,變質變味,淪為學校瘋狂催谷學生嘅工具,唔係今時今日嘅事,家長學生已經嘈咗幾年,教育官僚一直不知不覺已經夠離譜,等到事件一發不可收拾,仲係唔嗲唔吊,特別係人稱吳得掂嘅教育局局長吳克儉,唔知係咪嫌家長唔夠慶,呢頭搞出個大頭佛,嗰頭離港處理私務,連立法會聽證會都懶得蒲頭,咁搞法,唔爆大鑊至奇喇。

講真,TSA本身有冇存在價值,應該改善抑或乾脆取消,唔單止教育界有唔同意見,學生亦分正反兩派,有人呻到樹葉落,話壓力大到冇時間去玩,有人話當練習咁做,輕輕鬆鬆冇難度。不過點講都好,今時今日社會愈來愈政治化,你知喇,事關小朋友福祉,煽動性同號召力十足,政客仲唔見獵心喜,借頭借路搞搞震咩,點會心平氣和同你擺事實講道理吖。

不過又唔怪得晒班無良政客嘅,高官講一套做一套,授人以柄,一樣要負好大責任。咪睇佢哋將TSA吹到天上有地下無,講到好似考完可以攞諾貝爾獎咁款,查實自己啲仔女唔係去外國留學,就係讀國際學校,評估試呢啲粗重嘢咯喎,梗係留番畀小市民喇。最好笑嘅係,有教育局高官被議員兜口兜面追問仔女喺邊度讀書,當堂口窒窒粒聲都冇,醜態百出,令人嘆為觀止。

所以話,己所不欲,卻施於人,根本唔會有說服力。不妨打個譬喻,一個菜農落足嘴頭,講到自家產品點樣有機健康無公害,點知一個屈尾十走去街市幫襯芥蘭強,你話其他人點諗嘞。

嗱,咪話太一叮唔袋錢落你哋袋,連國家領導人都將孩子從美國學校召回國,正所謂上行下效,見賢思齊,港產官僚識點做喇,叮!