城中鏡：陳繁昌報名校曾遭拒

「自古成功在嘗試」呢句話看似老生常談，但唔少人士嘅成功關鍵同勇於嘗試離不開關係。科大校長陳繁昌尋晚出席一個交流會同青少年分享經歷，佢話自己當年都係唔怕失敗一再嘗試，先至得以入讀心儀嘅名校，令佢更加深信唔試過就唔會成功嘅道理。

陳繁昌當年唔怕失敗，終入讀心儀名校升讀預科。

陳繁昌憶述以前喺筲箕灣嘅慈幼英文中學接受中學教育，其後同另一名同學有意到皇仁書院升讀預科，於是一齊去報名，點知校方當時一睇陳嘅成績，就認為佢未夠班，連入學申請表都唔肯畀，相反同佢一齊報讀嘅同學就獲得取錄，陳對此當然感到失望。

然而過咗兩個禮拜，當日同行報名並獲取錄嘅同學向佢透露，原來預科班仲有空缺，建議陳繁昌再次報讀，陳喺母親鼓勵決定再試一次。結果同當時皇仁副校長會面傾談就通過面試，成功入讀名校。