城中鏡：無私助後輩

當日活動有八十幾間學校參加，見Stephen同王肇枝中學、英華書院嘅學生傾得特別開心，仲排隊合照，原來呢兩間都係佢母校。Stephen笑稱，佢中一至中五讀王肇枝中學，中六預科就轉咗去英華書院。佢後嚟嘅發展都算唔錯，會唔會激發起班師弟妹更發憤讀書呢？

選超級議席 何君堯以笑代答

轉頭見到公民教育委員會主席Melissa彭韻禧，近日政府頻頻約見新當選嘅青年區議員，唔知佢使唔使見埋一份呢？佢笑笑口話，呢啲工作當然交番畀青年事務委員會做喇！佢最近忙緊同一帶一路沿線國家嘅領事館合作，透過展覽等活動令各界明白相關政策。

律師會前會長、候任屯門區議員何君堯都在場，佢話對當選好開心。問佢明年會唔會參選立法會新界西直選，甚至俗稱「超級區議會」嘅區議會第二功能界別議席？佢就睩大對眼話「咁快」，然後笑而不答行開咗。