政壇：洪游奕做Bra 貪越女隻手

內衣製造商維珍妮上市主要為喺越南開廠籌資。照常理，揀越南係因為嗰邊有稅務優惠、人工又平啲，不過主席洪游奕自爆話仲有其他原因，就係貪當地女人隻手。

維珍妮本身嘅生產基地喺深圳，做Bra都係用緊中國女工。而要做一個好Bra，洪主席話手勢原來好重要。佢話越南女人對手同中國女人差唔多大，手勢又差唔多，所以佢睇過咁多地方，最終都係揀喺越南開。佢仲即場同大家分析佢哋生產嘅Bra同市面上其他產品有乜嘢唔同。

洪主席雖然係男人一個，但佢唔單止對Bra嘅唔同部件都瞭如指掌，開廠時連女工隻手嘅大細都考慮埋，唔怪得維珍妮可以接到Victoria's Secret呢啲大客。