政壇：鄉紳見CY神秘議政
各政黨、團體近期排隊向特首梁振英表達對新年度施政報告嘅意見，絕大部分喺會後都會大鑼大鼓會見傳媒，介紹佢哋向政府高層當面提出乜嘢建議，一旦喺施政報告被採納仲會高舉成功爭取嘅旗幟，之不過新界鄉議局尋日拉大隊見特首，事前無講會後喺邊個地方會見傳媒，會面後更靜悄悄拉大隊齊坐一早準備嘅旅遊巴離開，行蹤認真神秘。
劉業強稱劉皇發（圖）仍須留院觀察。 （資料圖片）
據悉，鄉議局主席劉業強同一批鄉事委員會主席都有參加會面，會上提及多項施政報告建議，另有提及丁屋、僭建、農業發展等政策議題，會面歷時約一個多小時，有鄉委會主席會後仲透露，今次會面氣氛和諧，似乎有意避免外間有不必要揣測。
談及外號「新界王」嘅鄉議局前主席劉皇發嘅最新健康情況，發叔長子劉業強話，醫生指父親情況未穩定，因此要留院觀察喎。
