政壇：陳岳鵬約「見」 唔使食檸檬
喺區議會選舉結束後，政制及內地事務局副局長陳岳鵬早前約見候任灣仔區議員楊雪盈，可惜慘「食檸檬」兼被質疑有「溝女」之嫌，據知陳岳鵬唔係淨係約楊雪盈，仲有約最少四名「傘兵」，尋日終於有好消息傳出告別食檸檬，就係候任東區區議員徐子見表明願意應約，又話「飲杯咖啡，無問題」。不過，現年四十八歲嘅徐子見係當選「傘兵」中年紀較大嘅一名，或者同政府有意搵多啲青年人溝通嘅初衷，兩者存在多少落差嘞！
徐子見
陳岳鵬
三「傘兵」拒見面
除咗楊雪盈早前公開同陳岳鵬社交網站私訊，請對方「食檸檬」，據知另外三名「傘兵」都向陳岳鵬派檸檬，包括候任觀塘區議員黃子健、候任沙田區議員黎梓恩同候任九龍城區議員鄺葆賢。
此外，候任沙田區議員黃學禮所屬嘅團體「沙田社區網絡」喺社交網站專頁發表聲明，事先張揚黃學禮唔會加入政府嘅諮詢委員會，既然黃無意加入委員會，佢至今無收到任何會面邀請，呢個情況係咪意料之內？
