中華出入口商會（中出）尋日搞傳媒蟹宴，立法會進出口界議員「象哥」黃定光、中出副秘書長周浩鼎等都有出席，基於象哥同周浩鼎都有建仔身份，自然被問及黨友立法會議員鍾樹根同EQ葛珮帆落敗一事。象哥甫開腔就批評該黨區選部署失當，唔應該只重民生，無視政治牌存在。對樹根區選落敗，象哥相對留一手，只係話受主觀、客觀因素影響，相反講到EQ歸咎嘅多個落敗原因，象哥毫不留情批評對方咪「賴地硬」。

象哥一開口批評就欲罷不能，借自己外號同EQ去非洲保育大象借題發揮，笑指EQ「救到我但救唔到自己」，明顯語帶雙關批評EQ只顧外遊而冇時間爭取區內選票。仲記得EQ喺區選落敗後，為敗選列舉多個原因，一時批評政府興建插針式居屋，一時又承認無打反佔牌，今次象哥發功狠批，未知係咪睇唔過眼某人藉口太多。但話雖如此，EQ本周會按原定計劃，喺立法會提出打擊走私野生動物嘅無約束力議案，似乎無論敗選與否，保育大象等野生動物都係EQ重點工作之一。

對於明年二月底立法會新界東議席補選，象哥繼續為建仔「吹淡風」，表明唔贊成該黨派人爭奪，除非有信心明年九月喺新東攞到三席又作別論，佢仲提出反建議，認為工聯會應派人出戰新東補選，點名指工聯會理事長吳秋北應「大膽啲」。眾所周知，象哥嘅太太就係工聯會會長林淑儀，身為工聯會姑爺嘅佢，呢個建議有心定無意，答案不言而喻！

第一手消息請下載on.cc東網iPhone/iPad/Android/Windows Phone Apps