政壇：選舉費豐儉不由人
選舉開支本來豐儉由人，多名盛傳有意出戰明年立法會選舉嘅區議員，都喺無對手情況下自動當選，選舉開支卻大不同，有人前後只花數百元就自動當選，而工聯會兩名「雙料議員」麥美娟同郭偉強都自動當選，埋單計數要花逾兩萬元；至於建仔北區區議員劉國勳嘅選舉開支約兩萬，但由佢所屬政黨全額贊助，換言之佢一蚊都唔使自己出。
今屆區選開支上限為六萬三千多元，各黨派參選人喺選舉結束後陸續申報選舉開支，其中一批自動當選嘅區議員，選舉開支更係差異甚大，舉例指盛傳有意接棒出戰批發及零售界嘅富貴黨邵家輝，成個選舉只係使咗七百多元，最主要係花咗近五百元畀該黨做行政費，另使咗一百五十元整證件相連攝影費，完全冇搵人捐錢贊助。至於新思維唯一自動當選嘅葵青區議員周奕希，合共花費七千多元，同樣係冇人贊助，用得最多就係畀咗四千元請兩個人做選舉助理同拉票人，而影相就用咗六十元左右。
自動當選須印單張報喜
至於麥美娟同郭偉強，選舉開支都超過兩萬元。資料顯示，麥美娟合共用咗兩萬六千多元，用喺廣告方面最多，使咗一萬八千多元整橫額、易拉架同五千張年曆卡等；其後喺區選提名期結束後十幾日，佢預料可自動當選後，喺十月底申報用咗幾千元印郵寄單張，估計好可能係向選民報喜自動當選。
郭偉強同麥美娟嘅選舉開支相差唔遠，合共用咗約兩萬元，當中用喺選舉廣告最無手軟，使咗一萬七千多元，及後同樣喺預料會自動當選後，亦申報用咗一千八百元印傳單。但扣除工聯會贊助之後，兩人分別要自掏荷包四千多元同近兩千元。
不過，要數選舉開支「零負擔」，盛傳可能會出戰立法會新界東補選嘅劉國勳係例子之一，事關佢選舉開支近兩萬元，包括一千八百元影樓照，又花咗一萬多元做宣傳，加埋建仔全數贊助選舉開支，所以佢連一蚊都唔使自己掏荷包畀。
