充電泊位配套差 推動環保大隻講
隨着溫室效應及厄爾尼諾現象愈來愈嚴重，全世界嘅天氣愈來愈反常，香港亦難以獨善其身，今年夏天係一百三十一年來最炎熱，淨係十一月嘅平均溫度就比過去三十年同期高出三度有多，都咪話唔大鑊。所以話，環保人人有責，全球暖化殺到埋身，大家都應該為減排出一分力。
係人都知，燃油汽車係主要廢氣排放源之一，近年全球各地積極推廣電動車，就係為咗減少排放。正所謂， 日子有功，隨着技術不斷改良，近年電動車推陳出新，唔止價格愈來愈平，車款亦愈來愈多，甚至有辣跑應市，令唔少愛車之人趨之若鶩。可惜吖，電動車喺外國行得通，喺香港就路路不通，事關港府闊佬懶理，配套設施長期不足，充電泊位少之又少，喺咁嘅情況下，電動車想普及都幾難喇。
呢嗱，為咗解決呢個問題，生產力促進局最近開發一套智能充電泊位監察系統，可以因應實際運作需要，靈活調配唔同泊位嘅供電量。最重要嘅係，停車場唔使大興土木改動泊位架構，亦唔使擴建火牛房，只需喺泊位加設智能電錶，三個充電泊位就可以變成六個，同一時間為更多電動汽車充電，既簡單又方便，都幾有諗頭㗎。
話時話，環保減排係大勢所趨，港人唔係唔想支持，而係配套不足而顧慮重重，如果呢項新科技可以增加充電泊位，車主無後顧之憂咯喎，相信電動車可以大行其道。
咁多年來，港府一直鼓勵市民使用電動車，可惜講多過做，一直唔肯諗辦法增加充電設施，卒之搞到唔湯唔水。好似政府轄下嘅停車場咁吖，話就話有充電泊車位，點知任何車都泊得，導致經常出現生人霸死地嘅情況，反而電動車冇機會使用相關設施，你話係咪攞嚟搞吖。
唔怪得有的士商曾輸入內地電動車，試用兩年就焗住退貨喇，唔係話電動車性能唔好，亦唔係嫌價錢貴，而係因為充電配套嚴重不足，搵地方充電嘅時間幾乎仲多過載客時間，司機就算慳咗燃氣費，都補唔番條數喇。
所以話，港產官僚吹水唔抹嘴，環保一事無成，唔係雷大雨小，就係虎頭蛇尾，即使勉強實施，最後亦搞到一鑊泡。計太一叮話齋，與其研究改良電動車充電技術，不如先諗吓點樣幫呢班庸官充電好過喇，叮！
