政壇：搞搞政：開Talk冇人捧 民主阿婆黑面離場
外號「民主阿婆」嘅前政務司司長陳方安生，未知是否年紀大，上周日區議會選舉只係到住所所屬選區幫「傘兵」拉票半小時，其他時間就去恤髮、歎茶過退休生活。到尋日佢出席香港大學學生會論壇，但全場只得一個觀眾，阿婆大感無癮，黑面離場。專業演員就算剩下一位觀眾，都要用心演落去，但民主阿婆呢嚿港英餘孽「舊電池」唔反省無心無力，兼無叫座力，反而黑面離場，專業度真係不如「茄喱啡」。
論壇搞手合十向黑面離開的陳方安生致歉。
聽眾僅一人發晦氣
港大學生會尋日朝早邀請校友民主阿婆出席「香港未來想像」論壇，同港大社會科學院院長卜約翰（John Burns）討論「公務員制度與特區政府管治困局」。比原定時間早到十五分鐘嘅民主阿婆準備好講稿，仲話歡迎學生提問，但十點開始嘅論壇，包括記者、學生會成員同講者，加起來都唔夠十個人，民主阿婆主動要求延遲十五分鐘「等齊人」先開講，可惜一班師弟、師妹唔知係咪未瞓醒，或冇興趣聽民主阿婆廢噏，加時後依然無人入場，無癮嘅民主阿婆就與身邊的卜約翰商量後，黑面話現場太少學生喇，好難與學生互動，還不滿叫學生會「下次安排好啲再搞」，然後攞袋走人，留下場內唯一觀眾及空櫈。
論壇搞手相當唔好意思，仲喺民主阿婆離開時雙手合十表示歉意。民主阿婆嘅叫座力變成咁，佢明顯被當頭棒喝，當住眾多記者都黑面，身為政治演員，真係要睇睇《演員的自我修養》本書增值吓。今屆區選有好多年輕人抬頭，長江後浪已經推前浪，民主阿婆與其不時出來指指點點，係咪應該順應年輕人「訴求」及早離場，交番個場畀年輕人呢？
