政壇：約楊雪盈飲嘢 陳岳鵬食檸檬
區議會選舉後，大批政治新秀登場，特首CY梁振英即時表示，政府會接觸當選甚至落選嘅青年人，睇吓佢哋有冇意思加入政府嘅諮詢委員會。話口未完，近日網上就流出，現時單身嘅政制及內地事務局副局長陳岳鵬（Ronald），上周二邀約候任灣仔大坑區議員楊雪盈（Clarisse）「飲杯嘢、傾計（偈）交流一下」，佢嘅邀約不但遭網民質疑目的係「溝女」，仲連Clarisse都唔畀面，公開回覆嗌佢落區，實有居民請佢飲嘢。呢次真係檸檬擊碎片片紅心囉！
自從政府揚言會接觸青年人之後，多個青年組織隨即透露，有官員聯絡佢哋會面，但似乎青年組織仍然有所猜疑。呢個時候，Ronald約晤Clarisse嘅消息又傳來，不過，據指佢嘅邀約唔似官場公文，邀請對方「飲杯嘢、傾計（偈）交流一下」，口脗驟看夠晒年輕，但似乎未能打動新任議員Clarisse嘅芳心。
被勸落區同街坊傾偈
Clarisse尋日公開回覆，反建議陳岳鵬晚上到區內小店，與該區居民聊天，如能解決困擾區內的問題，「街坊實會請番你飲嘢」，變相婉拒咗上任前同Ronald會面。事件引起網民熱議，有網民質疑Ronald係咪藉機會「溝女」。
據知，政府有邀約不同黨派、無論是當選或落選的參選人，但暫時未有傘後組織願意會面。其實Clarisse及另一傘兵、候任觀塘區議員黃子健第一時間回應CY，都稱對加入諮詢委員會持開放態度，但隨後在網上被質疑是否「染紅」，加入建制，一班傘兵恐怕被指出賣選民，立場遂變得強硬。有政府中人指出，事件被傘兵披露後，政府高層都感到緊張，着官員毋須太主動聯絡。
