曼城3:1挫「聖人」止跌
昨晚英超，近況下滑的曼城憑奇雲迪布尼、戴爾夫及高拉洛夫各建一功，主場以3:1擊敗「聖人」修咸頓，終止3仗不勝頹勢之餘，又打破「聖人」今季聯賽作客不敗金身，總算重上正軌。
奇雲迪布尼（右）開賽9分鐘就為曼城先拔頭籌。（法新社圖片）
美斯（左）為巴塞射入今仗第4球。 （法新社圖片）
曼城最近3場未嘗一勝，近兩仗對利物浦及祖雲達斯更遭逢連敗，今仗主場迎戰修咸頓急欲贏波振軍心，開賽不久即搶攻，9分鐘「聖人」守將吉田麻也竟在後場扭失波，被曼城翼鋒史達寧偷到再傳中，伏兵門前的奇雲迪布尼射成1:0。「藍月亮」打開紀錄後得勢不饒人，20分鐘戴爾夫接應角球於禁區外遠射，中途省中對方後衞華基爾雲迪積克改變方向，令門將史基倫堡欲救無從，藍月亮領先2:0。易邊後修咸頓由沙恩朗頂成1:2，未能挽回敗局之餘，更被高拉洛夫於69分鐘錦上添花，打破今季聯賽作客不敗身。
巴塞4球輕取皇蘇
至於榜末兩弱般尼茅夫及阿士東維拉齊齊不勝，前者主場3:3賽和愛華頓；易帥後未見起色的維拉，主場以2:3不敵新升班的屈福特，連續13場聯賽未贏過。
西甲方面，巴塞有尼馬梅開二度，蘇亞雷斯射入一記凌空世界波，同埋美斯補時埋齋，主場以4:0擊敗皇家蘇斯達。
