大橋延誤佗衰家 官僚無能枉解畫

大橋究竟幾時完工，至今仍然係一個謎，港府唔知係心虛定理虧，例牌以唧牙膏方式回應。署理運輸及房屋局局長邱誠武同路政署署長劉家強尋日又出嚟解畫，死撐影響工期嘅因素近日至比較清晰，最新評估最快二○一七年底完工，並具備通車條件，仲話向立法會追加嘅五十四點六億元撥款，已經計算咗三十宗承建商索償，應該足以應付喎。

係人都知，港產官僚無嘢叻，最叻就係隱瞞同欺騙，瞞得就瞞，瞞唔到就騙，大家早已見怪不怪。查實當局之前唔係唔知影響工期嘅因素，只不過想掩人耳目就真。正如有物料供應商話齋，目前施工困難多多，填海物料供應不穩係其一，再加上人工島移位問題，情況遠較港府公布嚴重。老實講吖，港產官僚聲稱二○一七年可以完工通車，睇怕都係大隻講嘅喇。

最好笑嘅係，港府仲實牙實齒話要再與內地及澳門當局商討通車日期，唔知仲以為係珠澳兩地拖延進度添。其實係人都知，珠海段進展順順利利，明年可以如期完工，至於澳門段雖然遇到某些阻滯，亦有變通方案確保順利通車，換句話講，港珠澳大橋萬事俱備，只欠香港，港產官僚明明佗衰家，仲想諉過於人，都唔知好笑定好嬲。

話時話，港珠澳大橋好事多磨，官僚無能固然抵鬧，而無良政客搞搞震亦難辭其咎。呢嗱，當年一場司法覆核搞到進度拖遲兩年，白白增加六十五億元額外開支，總超支隨時過百億元都似。唔係靠嚇㗎，港府下星期向立法會申請追加五十四億元撥款，萬一再遇到反對派政客拉布狙擊，唔止進一步影響工程進度，埋單計數又係一個無底洞吖。

冇計啦，近年香港基建工程幾乎無一不延誤，無一不超支，已經成為新常態。無論係廣深港高鐵及沙中線，或者係西九文化區，延誤超支早就唔係新聞，虛擲公帑事小，拖累經濟發展事大呀。

講到底，如果港珠澳大橋完工無期成為「現代世界七大奇迹」，咁港府施政混亂，官僚一味姓賴，絕對有資格榮登「世界八大奇迹」呀，叮!