以前喺外資銀行做，不知幾令人羨慕，但今時唔同往日，分分鐘畀人關心番「你嗰間未有人收信吧」。瑞信倫敦一炒就二百個Trader（交易員），德銀、法興同渣打都係咁裁裁裁，都咪話唔提心吊膽。但同人唔同命，上海啲銀行就缺外匯Trader缺到慌，事關人民幣就快入SDR個籃（即納入國際貨幣基金組織特別提款權籃子貨幣）。聽聞招行、浦發銀行同寧波銀行都爭搶外匯Trader，工行為咗請人留人仲不惜工本另加OT費。

點解咁渴人？主因係人仔交易多咗好多，操作又多咗花款，但內地有牌外匯Trader只得二百五十人左右。好多內銀交易部主管呻，依家啲客好多外匯要搞，生意自動送上門，但衰唔夠人手，生意白白流走，唔知點同老闆解釋。

內地咁缺人，不如搵歐美被炒嗰班越洋搵食？得嘅一早搞咗啦！事關內銀請老外，要向政府解釋做乜唔用本地薑。就算有解釋，都一樣中伏，事關非本地薑要另外考試先准喺內地Trade，快則半年，慢則……都係搶本地薑算！

第一手消息請下載on.cc東網iPhone/iPad/Android/Windows Phone Apps