政壇：乳鴿爭位爆內訌
區議會選舉塵埃落定，白鴿黨嘅立法會「超級」議員「AV仁」何俊仁喺區選敗陣，喪失參選超級嘅入場券，而黨友前議員「高達」嘅老婆陳樹英都輸咗，喺呢啲「老鴿」落選後，該黨嘅區選總結就係勝出嘅人數同預期差唔多，仲強調更新完成，因為有一批「乳鴿」上咗位。但勢估唔到區選完咗唔夠一個禮拜，班乳鴿就為爭出選立會爆內訌！乳鴿柴文瀚同「峯鴿」許智峯現正爭取出戰立法會香港島直選，與柴同屬南區區議員嘅該黨副主席羅健熙，前晚仲忽然喺社交網站撰文，表明義無反顧撐柴出選。
「鎂光燈焦點」 諷博出位
外界一直傳聞，話AV仁參與區選只係為個黨買保險，攞多張超級嘅入場券，而屬於黨內第二梯隊嘅乳鴿羅健熙極有可能同黨內嘅立會超級議員涂謹申，出年一齊參戰超級議席，若果有呢個落腳點，羅當然唔使爭港島直選喇！唔知係咪因為咁，所以就轉撐其他黨友呢？
羅健熙喺社交網站撰文話白鴿黨應該專注地區，畀黨友知道個黨係珍惜佢哋喺地區嘅付出同承擔，而唔係做一兩屆區議員，賺到某些鎂光燈焦點，就放棄有能力再進一步鞏固地區實力嘅黨友，而柴文瀚就做到呢一點，代表咗堅守地區、默默耕耘嘅一代，鞏固白鴿黨喺南區嘅實力。
咦，羅健熙突然擺姿態，仲提到「鎂光燈焦點」，似乎話中有話，不禁令人諗起「峯鴿」，因盛傳「峯鴿」都想出戰港島直選。「峯鴿」成日喺中西區區議會博出位，與同區嘅甘乃威、鄭麗琼關係不佳亦係公開秘密，加埋「峯鴿」今次選舉只係贏百多票，反而其他南區黨友就最少贏幾百票，甚至過千票，可見南區勢力較穩，睇嚟今次乳鴿爭位有排鬥嘞！
