尋日係二十四節氣裏面嘅「小雪」,北京等地確實飄雪,反而香港最高氣溫有成廿八度,係五十幾年來最熱嘅一次。同本港天氣啱啱相反,零售業遭遇嚴冬,嚟緊聖誕新年零售旺季大吹寒風,連一向皇帝女唔憂嫁嘅旺區商場舖割價放租都冇人吼,問你怕未!

呢,本報記者最近到訪各旺區商場,眼前所見只可以用一個「慘」字嚟形容,雖然唔少商場主動減租留客,其中銅鑼灣有商場業主更大手筆減租七成,由以往二萬多元大幅降價至八千元,可惜仍然有近半商舖空置。有商戶呻到樹葉都落,話商場人流稀少,基本上已經冇walk in客,搞到佢開舖時間愈縮愈短,最後都係做唔住,惟有搬去附近商住大廈;亦有商戶索性轉攻網上生意,連舖租都慳番。有業界人士警告,好多商戶仍持觀望態度,諗住睇埋聖誕新年檔期生意,如果仲係冇起色,分分鐘掀起另一次執笠潮添呀!

咪以為危言聳聽吖。大家落旺角、尖沙咀、銅鑼灣等旺區兜一轉,啲金舖藥房拍晒烏蠅,再咁落去,旺角遲早要用番原名「望角」。鬼咩,店員仲多過顧客,除咗你眼望我眼仲有咩細藝吖。

點解減租仍然幫唔到零售市道呢?一來呢幾年租金節節攀升,搞到連國際名牌連鎖店都頂唔順,減租後水位仍然偏高,對商戶幫補有限。二來咯喎,業界看淡經濟前景,如果冇人肯消費,點減租都冇用嘅咋。正所謂賤物鬥窮人,業主肯低價出租,只係證明整體營商環境愈來愈唔掂咋。

可能有人會話,香港消費市場愈來愈倚賴內地水喉射住,內地經濟前景不明,香港亦唔使旨意有運行。之不過咁喎,爛船都有三斤釘,十三億人龐大市場,一小部分人使得起錢,條數已經好襟計,今年「雙十一」光棍節,銷售額突破九百億元人民幣,都咪話唔得人驚。今年十一長假內地客海外消費額,更比去年同期勁升近一成。家陣全球各地迎接中國財神唯恐不及,唯獨香港財神當瘟神,政府唔諗吓點樣增加旅遊設施,部分市民視內地人為仇寇,淨係一場港中足球比賽都搞到打仗咁滯,加上旅業醜聞不絕,梗係肥水流向外人田喇。

點講都好,禍福無門,惟人自招,香港成功之道全因為打開門迎四方客,賺四方錢,閉關自守,畫地為牢,盞大家攬住一齊死嘅咋,叮!