城中鏡：劉詩昆女友賀牛一
「鋼琴公主」孫穎前晚舉辦四十歲生日派對，佢同「鋼琴大師」男友劉詩昆手拖手現身餐廳。戴上兩隻鑽戒、鑽石錶同鑽石頸鏈嘅佢透露，手上嘅六卡多方形巨鑽戒同鑲嵌二百多顆D級鑽石嘅腕錶，都係由男友所贈。佢話本月十五日係佢嘅正日生日，當日同男友二人世界，而嗰晚則約咗一班同係天蠍座嘅朋友一齊慶祝生日。佢笑言：「都係搵個理由搵搵香港啲朋友聚吓，今日大概請咗二十五人，不過籌備得都好匆忙。等我哋喺御龍山嘅私人藝術館可以見人，以後啲活動就可以喺嗰度搞。」
「鋼琴大師」劉詩昆（左）以人生火車論比喻佢同孫穎嘅關係，女友孫穎即冧爆。
孫穎戴上男友送嘅六卡多方形巨鑽戒同鑲嵌二百多顆D級鑽石嘅腕錶。
劉詩昆話雖然女友嘅生日已過咗一星期，但嗰晚仲有其他朋友生日，一齊慶祝，所以非常高興。問佢送咗乜嘢禮物畀女友？佢話：「我們兩個人不需要送特別的禮物，今天的派對我們一起籌備，我親手寫了朋友的名牌。我們兩人做事親力親為，做到最好。」孫穎接住話：「除咗有靚嘅食物同酒，我哋都想有啲心意畀到朋友，個名牌可以畀佢哋留為紀念。」劉詩昆話與女友心靈相通，無論做法、計劃、打算都一樣，例如選名牌嘅卡紙，二人都選相同款式。
「遇上她年輕了」
問到劉詩昆係咪今年娶女友？佢話：「我一定會跟她永遠在一起，人生以火車來比喻的話，我跟孫穎是最後一卡，或者也可以說是人生真正的第一站。過去的站，今天過來，已不值得回憶。感謝上帝給最後是美好、永遠的。」在旁嘅孫穎即冧爆話：「好sweet！」問到劉詩昆係咪驚喜求婚？孫穎即為男友擋駕：「我哋已經係靈魂伴侶，超越咗求婚同結婚。劉老師佢睇嘢咁有智慧，我覺得佢可以活到一百五十歲。」劉詩昆亦風騷咁話：「跟她在一起之後，我無論外貌及心境都年輕了，以前蒼老些。」
