政壇：楊偉雄電玩攞零分
啱啱上任嘅創新及科技局局長楊偉雄，尋日出席香港電競總會創會典禮及電子競技表演賽，身體力行支持新興電子競技行業，仲參與競玩經典電子遊戲俄羅斯方塊嘅終極版，可惜以零分大敗畀該會副主席楊全盛同主席周啟康。
楊偉雄（左二）比賽俄羅斯方塊遊戲得零分。
遊戲比賽以四人對賽形式進行，除咗楊偉雄、周啟康、楊全盛參賽外，仲有政府資訊科技總監楊德斌。賽事開始前四人已先展開牙骹戰，面對自小已玩俄羅斯方塊嘅周啟康同大學時代學寫過呢個遊戲程式嘅楊全盛，楊偉雄則淡定話「凡事都有第一次」，仲話「輸咗都冇問題」喎，鬥志一般，似乎預咗會落敗，如果用咁嘅心態推展香港創新科技發展，咁就真係弊嘞！果然比賽開始幾分鐘，楊偉雄同楊德斌已雙雙「game over」，連一分都未攞到就已戰敗。
