政壇：搞搞政：新東補選鬼打鬼 泛民盞益建制派

傳建制出怪招練兵

眾所周知，泛民極有機會協調公文袋楊岳橋參與補選，而「新思維」副召集人黃成智都有可能參選。楊岳橋勝負較有重要意義，因為係接棒其師傅湯家驊嘅議席；相反黃成智參選就可當熱身，甚至為其新政黨免費宣傳，反正約半年後，又到新一屆立會選舉，喺比例代表制下，仍有機會贏得一個議席。不過，無論勝負機會如何、背後有何目的，兩名泛民「鬼打鬼」對戰無可避免會分薄票源，有利建制派。

建制派方面，一直有傳會由建仔派人出選，但新界東一向係泛民票倉，喺單議席單票制方式下「隻揪」，建制派根本冇勝算，再加上多名個別人士界票，差唔多等於輸硬。有建制派內部人士忽發奇想，與其螳臂當車，不如出怪招，建議幫助第二梯隊練兵，或會派出周浩鼎、劉國勳、張國鈞分三條隊參選，呢個安排可讓幾位新人賺取知名度同選舉經驗，甚至作為黨內篩選。

周浩鼎被傳會出選立會超級議席，佢同劉國勳出選新界東都說得通，但嚟自香港島嘅張國鈞又同新界東有乜關係呢？建制派內部認為，新界東補選期間，全港只有一個選舉，各界都會留意選舉論壇，張國鈞可以喺論壇上宣傳，反正說話內容唔受限制。但周浩鼎同劉國勳對戰，最終劉國勳取得較多票數，周浩鼎自然比下去，加上劉國勳嘅資歷同選舉經驗較為豐富，如果同周浩鼎爭出戰立會超級議席，或會出現爭拗同造成內耗。