政壇：搞事四人幫 區選hea爆
尋日區議會投票日，被指為「搞事四人幫」嘅「民主阿婆」政務司前司長陳方安生、「李漢奸」白鴿黨創黨主席李柱銘同壹傳媒集團前主席「肥佬黎」黎智英各有各忙，但唔係四出為朋黨拉票，而係一個去恤髮、一個去行山、一個去歎茶，完全hea爆。至於曾被指收受肥佬黎捐款嘅立法會議員「長毛」梁國雄，今年竟然無趁特首去投票時搞抗議騷，更坦白話忘記特首投票呢個環節，莫非長毛無「水腳」去示威？
肥佬黎全日低調無助選，下午到尖沙咀歎茶。
恤完髮就去行商場購物血拼。
民主阿婆助選半個鐘後，返一返屋企就去銅鑼灣恤髮。
李漢奸（右）投票日早上去山頂盧吉道行山。
李漢奸早上七點幾鐘就出門口，唔係去為黨友助選，而係去山頂同外籍好友行山。兩人喺盧吉道行咗兩個圈，李漢奸就返屋企，到差不多中午十二時先由老婆車去香港公園票站投票，投完票又返屋企，直至傍晚先外出到中環香港會所食晚飯。舊年三月南區區議會海怡西選區補選，都見李漢奸落區幫黨友「單雞」單仲偕拉票，可惜單雞慘敗。未知係咪自知政治影響力所剩無幾，所以費事再助選「佗衰家」？
至於民主阿婆早上近九時曾到司徒拔道幫傘兵區麗莊拉票，但企咗半個鐘就返屋企，之後再坐的士去銅鑼灣恤個靚髮。恤完髮就穿梭商場shopping，血拼咗差唔多個半鐘，結果手挽五大袋戰利品返屋企。直到下午兩點幾鐘，民主阿婆又再出動，今次係同民政事務局前任常任秘書長李麗娟喺大潭雅柏苑短敍。相比四年前區選投票日，民主阿婆同李漢奸一齊喺山頂選區幫公文袋陳淑莊站台，又向選民揮手，似乎民主阿婆嘅動力同影響力一樣已到尾聲。
長毛唔記得去搞事
作為泛民主派最大「金主」嘅肥佬黎，尋日早上好深閨，下午點幾鐘先出動同家人去尖沙咀歎茶，三點左右再去太子道票站投票，全程好低調。至於長毛，朝早喺港島區幫人助選，但就無趁特首去票站投票踩場叫口號，令投票過程十分平靜。我哋打電話問長毛係咪安排咗秘密行動，點知佢答話：「完全唔記得今早特首去投票，你哋走啦，我唔會嚟㗎嘞！」長毛竟然連搞事都忘記咗，真係世界變嘞！
