俗語話，寒天飲雪水，點滴在心頭。雖然香港天氣唔係幾凍，但旅遊業界就唔同喇，呢個冬天真係唔易捱。

唔係誇張㗎，隨着訪港旅客持續下跌，加上平均消費減少，旅遊業步入寒冬，酒店業首當其衝，業內人士叫苦連天。由年初至今，酒店整體入住率跌咗四個百分點，平均房價就減咗超過一成，預料嚟緊嘅聖誕節都唔樂觀，可以講係屋漏偏逢連夜雨，唔知仲要捱到何時何月。當局寄望珠三角旅行團打救喎，睇怕都係一廂情願嘅喇。

正如業界人士話齋，本港旅遊業一味食老本，加上亂象多多，醜聞百出，想唔入寒冬都幾難。好似備受詬病嘅低價團咁吖，兩地當局曾經誇下海口要嚴打，可惜講就天下無敵，做就有心無力，咁多年來低價團唔止冇消失，反而愈演愈烈，除咗有「刀手」劏客，仲有影子團友，做媒呃旅客不特止，而且充當打手逼旅客購物，早前終於搞出人命，令香港臭名遠揚，旅遊業雪上加霜。

最離譜嘅係，激進組織無事生非，不斷趕客，又驅蝗，又光復，搞到永無寧日，更加令旅客避而遠之。對呢啲亂象，當局一直坐視不理，淨係識得花錢宣傳，一時成立姿勢大於實際嘅旅遊配對基金，一時搞乜嘢「香港繽紛冬日節」，根本就係浪費公帑。

話時話，要解決影子團友問題，其實有好多辦法，關鍵係當局肯唔肯做啫。呢嗱，國家旅遊局喺十一黃金周期間派人暗訪二百多次，揭發唔少亂象；甚至連內地電視台記者都識得放蛇，話咁易就踢爆低價團種種黑幕。人哋做得到，點解香港做唔到呢？講到底，非不能也，實不為也。

正所謂，知恥近乎勇。可能畀人批評得多啩，旅議會終於肯出手，聲稱會派出「影子調查員」對付「影子團友」，監察有冇強迫購物情況，一經發現即送官究治喎。嗱，呢啲咪叫以其人之道還治其人之身囉，旅議會早就應該咁做喇。

當然喇，除咗改善形象，拓展商機亦好重要。旅遊業界人士指出，香港旅遊業一直缺乏統籌機構，大家各自為政，互不協調，想唔輸畀鄰近地區都唔得啦。

黃台之瓜，不堪再摘。家陣香港樣樣都唔掂，旅遊業固然寒風陣陣，其他行業亦唔好得幾多，如果當局再唔做啲嘢，香港唔止係黃台之瓜，遲早成為瓜直個瓜吖，叮！