政壇：趙永佳借港足批本土排外
世界盃外圍賽亞洲區Ｃ組嘅重頭戲「港中大戰」上星期和波收場，但比賽前後嘅熾熱氣氛同背後帶出嘅中港矛盾係焦點。中文大學社會學系教授趙永佳，尋日就藉寫「家書」畀同樣熱愛足球嘅囝囝，指香港所謂嘅本土意識，有好多成分其實係「小市民式的庶民心態」，情況就好似電視劇「七十二家房客」入面，低下層市民為求生存，放下內部分歧，眾志成城抵抗代表外力嘅包租婆一樣。
趙永佳喺家書寫道，港隊當晚連後備上陣嘅十四位球員當中，除咗六人係香港土生土長外，仲有來自非洲、巴西、英國同內地來港嘅「新香港人」，連教練金判坤同體能教練池田誠剛都分別來自南韓同日本。佢認為港隊能夠團結五湖四海嘅球員，踢出一場好波先係真正嘅香港精神，所謂本土意識，有時都分唔清邊個先至係本土、主體。佢仲話，如果香港要限制外援，本地球員要喺保護主義下先踢得上職業，咁不如轉踢業餘「衞生波」算喇！
趙永佳續指，呢場港中大戰其實揭示咗香港喺全球化世界中嘅機會同困局，一方面香港向全球開放吸納各地人才，但同時引發唔少副作用同社會矛盾，大家應該關注點樣處理全球與在地之間嘅張力至啱。
