政壇：搞搞政：行醫亂撞 做官庸碌 廢鑊半生 反面人辦
外號「廢鑊」的食物及衞生局前局長周一嶽（周一鑊），掌管食衞局八年期間屢爆醜聞，惟兩年多前仍獲「翻閹」出任平等機會委員會主席，結果又引起多多爭議及火頭。周一鑊尋日應邀向中學生分享所屬專業範疇的經驗，席間他自爆多個志願冇一樣能實現，就算做到骨科醫生都係誤打誤撞，最初唔熟手仲要「睇住本書」做手術，嘩，病人真係多謝佢囉。周一鑊庸庸碌碌喺醫學界同官場打滾大半生，入廚房燒燶嘢，真係反面人辦有佢份！
佢話中四、中五時並唔想做醫生，而係想做精英運動員，又好鍾意音樂，諗過做歌手，可惜無呢方面嘅天分，惟有放棄，難怪佢家吓都咁恨唱歌，「嶽曲」走音兼慢半拍，仲係「樂」此不疲。跟住選讀文科或理科又舉棋不定，到醫科畢業時，佢本來想做外科醫生，冇空缺，又去咗急症室，期間遇過唔少災難性棘手問題，做咗急症室一段時間後，見骨科有位，又去咗骨科工作，跟住有興趣先繼續做落去。
七十年代，周一鑊去咗瑪嘉烈醫院做開荒牛，適逢當時屯門公路啟用，每晚都有人因飛車而受傷入院，加上工廠受傷嘅，幾乎每晚都有十個、八個病人送院治理，由於當時醫生人手不足，「啲嘢唔做就無人做，唔熟手嗰啲就睇本書照做」。係咪兒戲？佢都補飛話，當年至得囉。講完呢個見步行步、亂打亂撞嘅經歷，台下反應點？幾乎冇乜人舉手發問，搞到周一鑊只好面懵懵等散場，真係夠面懵。
