經歷立法會三年半「拉布」，創新及科技局（創科局）終於喺前日成立，呢一拉，就拖到局長楊偉雄（Nic）嘅任期只得一年半，連中途換將嘅兩個新局長，任期都長過佢。佢日前提出九項重點工作，落唔落實到？有冇先後優次？佢尋日話九項工作要同時做，又叫大家畀啲時間佢喎！家吓唔係人哋畀唔畀時間你，係你嘅任期真係好有限吖嘛。

Nic話，佢唔會分先後次序處理九項重點工作，因為九項工作同樣重要，要同時進行，佢仲透露有啲工作已經喺創科局成立前開展咗添！不過，佢都承認依家要追番失去嘅時間，但強調無時間唔係問題，並唔代表乜都唔做，仲講明要靠廣大市民合作，再同業界溝通得出細節。

業界施壓 冀創機遇

現時好多工業都毋須佔用太多空間，Nic話會搵有經驗嘅人，利用創新科技去創造適合香港嘅工業，又強調自己知道點樣做，更再三重複畀時間佢工作呢個希望，認真長氣。佢到最後仲大賣關子，好風騷話無人想聽佢講「再工業化」嘅細節，因為會覺得佢太誇張，睇嚟佢對自己嘅諗法信心爆棚，一定極為創新嘞，希望創科局唔好令人大跌眼鏡啦！

另外，資訊科技界議員莫乃光接受電台節目訪問時話，今次係首次由業內人士負責資訊科技政策，希望可以喺政府內部推展創新科技，而且能夠為青年人創造機會。而香港科技園公司創業培育計劃主管莫偉軒亦表達期望，希望創科局可以透過人力資源同融資去協助業界，提供新指引。睇嚟Nic除咗時間不足，仲要面對唔少業界壓力，短短年半任期真係困難重重！

第一手消息請下載on.cc東網iPhone/iPad/Android/Windows Phone Apps