天下之大，無奇不有。前特首曾蔭權爵士爆出連串醜聞，廉政公署調查超過三年，早前終於落案控以兩項公職人員行為失當罪，案件已經進入司法程序，照計唔應該再公開評論，否則隨時被控藐視法庭都似。點知有人居然不顧瓜李之嫌，唔止為曾爵士大吐苦水，而且替佢塗脂抹粉，簡直匪夷所思。

講緊邊個？咪就係人稱「民主阿婆」嘅陳方安生囉。佢質疑曾爵士單案拖咗三年幾，「點解要咁折磨人」；仲話曾爵士「對香港非常有承擔，亦都有政績，大家可以有目共睹」，指傳媒追訪搞到佢「精神上壓力非常之大」喎。

民主阿婆一向語無倫次，大家見怪不怪，估唔到佢連基本常識都冇埋。香港有新聞自由，曾爵士身為公眾人物，牽涉連串醜聞，成為首位被廉署調查並被起訴嘅前特首，傳媒追訪有乜咁出奇吖。民主阿婆唔去問曾爵士點解醜聞纏身，反而替佢訴苦，簡直係顛倒是非，九唔搭八。

講到曾爵士嘅所謂「政績」，咁就巴閉咯。前朝政府施政無能，一事無成，留低唔少爛攤子，房屋、安老、教育、醫療等問題愈演愈烈，尤其係房屋政策嚴重失誤，樓價租金不斷飆升，搞到劏房遍地開花，唔通呢啲就係曾爵士嘅政績？唔通呢啲就係所謂嘅承擔？民主阿婆不妨去深水埗等舊區睇吓，到時就知乜嘢先至係精神壓力喇。

話時話，民主阿婆為曾爵士吐苦水，一啲都唔出奇。佢哋都係飲英國奶水長大嘅餘孽，依家曾爵士有難，民主阿婆兔死狐悲，都好正常啫。正如有人話齋，同是天涯墮落人，港英餘孽互扯貓尾，簡直係醜態百出吖。

講起都好笑，民主阿婆當年對英國人唯唯諾諾，完全唔識民主為何物，回歸後「忽然民主」，當正自己係港產「昂山淑姬」，簡直唔知醜字點寫。最離譜嘅係，呢塊政治舊電池唔止不甘寂寞，而且不知自量，成日拍住有「漢奸」之稱嘅李柱銘去外國告洋狀，千方百計唱衰香港，你話佢究竟有乜居心吖。

都係古人講得啱，綿綿不絕，必有亂結；纖纖不伐，必有妖孽。香港烏煙瘴氣，七國咁亂，咪就係因為餘孽為患囉。既然民主阿婆不甘寂寞，不如組織一個「餘孽黨」，搵埋一班同路中人再戰江湖，咁就真係群魔亂舞喇，叮！