城中鏡：童愛玲訪山區 關注兒童醫療
關注內地兒童醫健事務的兒童醫健基金會尋日舉行二十周年紀念活動，基金會一眾負責人及形象大使童愛玲（Eileen）都有出席。已經連續三年為基金會擔任大使嘅Eileen話，舊年仲隨基金會深入貴州山區探訪，了解機構嘅工作，佢覺得捐錢雖然都可以做善事，但有啲前線援助工作，就必須要基金會呢類機構先可以做到。
童愛玲連續三年擔任兒童醫健基金會大使，希望可幫助更多兒童。
訪問淚難忍
佢話，去年探訪時仲深入了解咗一啲受助家庭，有個家庭透露，佢哋有對早產孖女，求醫唔單止需要錢，仲需要儀器，結果基金會提供咗金錢協助，二十四小時內就送咗早產嬰兒去醫院，留院21日後，本嚟以為早產兒冇機會生存，最後都度過危機。佢坦言：「我做訪問時都會喊，因為喺香港好少見呢啲情況，就算有啲BB本身冇事，但都會因為唔知點照顧而出事。」
