城中鏡：毅行未驚過
樂施會超級毅行者尋日又出動，今年共有一千三百隊、五千幾人參加，唔少商界領袖都去行埋一份，包括香港總商會總裁袁莎妮（Shirley）。Shirley話，平時有行開山，每次大約兩三小時，所以今年未驚過。佢在外國讀大學時會踩單車代步，最遠距離試過穿州過省踩足十八英里（約30公里），真係唔講得笑。佢話返香港後都買咗架單車，但覺得香港路面唔安全，所以都係得個擺字喎。
今年共有一千三百隊參加樂施會超級毅行者。
袁莎妮平時行開山運動量充足，參加毅行者未驚過。
陳智思與一眾毅行者主持起步儀式。
史泰祖難忘行到膝痛
身兼籌委會主席的行政會議成員陳智思（Bernard）就話，佢已行過毅行者四屆半。咁半屆係咩意思？原來係因為當年佢做緊保險界立法會議員時，有同事發起組隊玩吓，結果得佢同議員梁耀忠兩丁友，兩人又冇一齊操過，最終以非正式隊伍參加，接力各自行五十公里，未能符合行完一百公里的要求，所以咪得半屆囉。
Bernard又話，雖然每次參賽都準備充足，但每次總有啲阻滯，唔係自己傷就係隊友傷，拖慢進度，又乘機奉勸大家要買定保險參賽喎。講開嶺南大學近日飽受國力書院風波困擾，曾任嶺大校董會前主席的Bernard話，相信管理層會適當處理，認為政府不應作出監管，否則會影響學術自由喎。
同場仲有史泰祖醫生，佢自稱有十年毅行者經驗，但已經老咗所以唔行嘞，仲話尋日天陰陰好似好舒服，但潮濕翳焗，比較難出汗，提醒參賽者要留意。講起行山經歷，史泰祖最難忘有次行到雙膝痛，隊友即時畀埋支行山杖佢，冇咗支杖嘅隊友自然行得更辛苦，兼且要「等埋」佢，令佢好感動喎！
