政壇：梁君彥細聲唔對咪 卿姐發火
立法會議員劉慧卿（卿姐）一向都大情大聖，說話比較直接，覺得唔啱嘅嘢就即刻出聲。卿姐尋日向內務委員會主席梁君彥（Andrew）開火，批評佢講嘢太細聲。
劉慧卿鬧爆梁君彥唔對咪講嘢，搞到好細聲聽唔到。
話說內委會講到建築物修訂條例，先由小組委員會主席麥美娟發言，之後到Andrew交代進展，點知卿姐就話聽唔到佢噏乜，仲話唔係只得自己聽唔到，又寸其他議員就算聽唔到都好似無所謂咁。Andrew繼續解釋條例幾時上大會，但依然唔對住咪講嘢，搞到卿姐「㷫」過火屎，鬧佢可唔可以對住個咪講嘢，或者叫秘書整大啲個咪。
之後卿姐想知道有關條例上大會嘅日期，Andrew就同秘書商量，卿姐呢個時間終於要爆喇，批評個個講嘢都唔對咪，點樣聽到講乜？搞到Andrew同秘書都幾尷尬。點知卿姐問咗四、五次，Andrew同秘書都係未答到，要由秘書長陳維安出手，一錘定音話下月二日上會先平息風波。
